如果要數香江第一惹火尤物，八方敢講李家二少澤楷認咗第二，絕對冇人敢認第一，就連佢身邊啲人都夠晒新聞性。咁今日講乜？當然唔係經已揭咗盅嘅世紀賣產風波，亦唔係二少冇去聽歌聲魅影令大家撲空，而係二少重酬要佢留低響8號仔把關嘅阿Jack蘇澤光！
話說噚日有報紙頭條將阿Jack嗰張新合約赤條條咁公之於世，完全冇私隱可言，咁樣已夠奇，但更正係話阿Jack一早知道二少準備售股，於是加入咗一條為佢度身訂做條款，大意係話如果8號仔最大單一股東有變，佢有權唔do兼夾拎到1,875萬安家費云云。阿Jack有冇唔高興八方唔知，但照計佢張新約係響今年3月29號簽，係二少正式公布要賣仔（6月19日）前幾個月，咁睇單交易早喺3月已開始！

咁𠵱家二少離場，阿Jack會繼續留守太古坊又或拎埋安家費鬆人呢？計八方話，阿Jack一早就夠晒條件上岸，亦唔需睇任何人面色，只係當年超人個孻仔二少叫到，所以不妨入去8號仔玩幾年，叫做打過李家工咁囉！而過去呢幾年呢，8號仔成個勁有layer嘅管理層（二少話嘅），根本就係男版「金枝慾孽」，個個都爭寵，阿Jack同二少另一頭馬袁大師成日鬥生鬥死，遠到隔幾個站嘅筲箕灣都知啦，而𠵱家入主嘅竟然係袁大師個師弟，如果八方係佢，一定會撇囉！