當年今日
關於我們

【人大選舉】田二少殺出重圍 得票率高過上屆

蘋果日報 2017/12/19 12:41

田北辰人大選舉

通常人大代表要爭取連任,機會都會大好多,但今屆想冧莊嘅田北辰,卻一直面對壓力,皆因建制派早喺佢表態爭連任後,已放風話佢同人大陣營經常口徑不一,標奇立異,想佢墮馬,田二少都知呢點㗎,但佢堅持做個開放建制派,繼續有話直說,結果係點呢?
八方之前都寫過,田二少不單只喺西環41人點燈名單,後期仲在核心「16+1」名單,係阿爺要重點力保嘅候選人,以免被人覺得中央封殺敢言之士,而田二少亦好努力,親自接見選委拉票,而佢嘅提名更少有地係攞足38個選委會界別,提名廣泛性及光譜之濶,相信參選人中係罕有。最終佢以1,543票,以約86%得票率成功連任,得票率多過上屆嘅79%,排名由上屆28升至今22位,吐氣揚眉。
田北辰話好開心,因為3次參選以來,得票排名由最初第32位、到上屆排28,今次更上升至第22位顯示自己做啱咗,佢認為自己嘅工作亦得到選委認同,形容今次參選係好好嘅過程。