於美劇《荒原》（IntotheBadlands）中坐正男主角兼負責監制嘅吳彥祖（Daniel）日前在港接受訪問，直言今次拍劇好辛苦：「要喺拍電視劇的時間內拍多場武打戲係好困難，我喺嘅目的係想將港式嘅武打方法放入美國電視，終於明白之前點解冇人拍，因為真係好辛苦！每一集得八日時間，八日內要拍兩場打戲，整季六集共有十二場打鬥戲，於四個月內進行。結果我喺四個月拍咗十一場打戲，根本冇休息，一星期要開六日工。」
原來Daniel一開始冇諗過過由自己演出：「因為有咁多場打鬥戲，我已經40歲，本來呢個角色係寫俾一名二、三十歲嘅人，因為成功嘅話，係有機會拍五、六年。」

Daniel認為呢部美劇最大嘅改變，係搵中國人做主角，佢話：「美國人，特別係電影公司、電視台開始明白到唔可以單用西方人，現今所有事都世界化。所以你見到近幾年合拍片，好多西片都搵中國演員。」

他透露理論上AMC已經同意拍第二季，希望可在劇集引入更多中國演員。Daniel指劇中其他演員原來本身唔識拍打戲：「拍攝前有六個星期嘅訓練，要由零開始訓練，有時我哋要做埋心理醫生，因為訓練期間佢哋會懷疑自己做不來。」

Daniel亦趁機會解釋劇集靈感與西遊記嘅關係：「西遊記中孫悟空去取西經性格前後都好不同，因為通過唔同經驗令性格有改變，辛尼開頭係冷血殺手，慢慢會軟化下來，所以係用咗西遊記概念。」吸收喺美國拍劇嘅經驗後，Daniel仍然覺得香港嘅拍攝團隊係最靈活，始終都係香港好。