當年今日
關於我們

金手指:暴利稅可令中海油跌25%?!

蘋果日報 2006/08/30 08:00


相信大家都知道,呢個月來陸陸續續都有上市公司出上半年業績。咁8月尾,就係我哋特區上市石油公司公布業績嘅高峯期。上個禮拜就有中石油857,前日就係中石化386,噚日輪到中國海洋石油883公布業績。噚日孫柏文同大家講過,我對中石化嘅睇法。今日,我想同大家講我點睇中海油嘅前景。
不過,講中海油之前,我想問點解做同一個行業嘅上市公司,都要一窩蜂同一時間出業績。點解唔可以分開出?我哋特區有三大間主要石油公司上市,如果一禮拜出一間業績,我就可以有平均用一個禮拜時間去分析一間上市公事嘅業績。唔似𠵱家咁,前日睇中石化,尋日就即刻要睇中海油。
我懇求上市公司咁做嘅原因,係因為以前做分析員嘅時候,如果你睇嘅行業仲未到出業績期,工作就會比較他條,不過一到業績期,就可以同家人講聲「一兩個星期後再見」,跟着就要不眠不休幫啲公司計數。
最搞笑嘅地方,就係每個行業都有自己不同嘅業績高峰期。所以好多時候,你會見到有啲分析員,因為佢睇嘅行業進入高峰期而辛苦工作,不過同時間見到有啲分析員,因為佢睇嘅行業未進入高峰期,而「行行企企」。
講番中海油,上半年業績保持強勁升幅。又再一次賺好多個億人民幣。不過,孫柏文覺得今次業績最矚目嘅係,「上游暴利稅」對中海油盈利變化嘅影響。亦因有呢個暴利稅,我覺得好彩中海油冇被市場看為一間高速增長嘅花旗國科技公司。大家可能會問:「點解咁講?」
理由其實都好簡單,大家都知道好多花旗國科技公司都「好貴」。「好貴」嘅意思係一間公司如果每股盈利有1蚊,股價可能有50蚊。即係股票術語話嘅「市盈率」有50倍。呢啲科技公司咁貴嘅原因,係投資者覺得佢哋盈利可以高速增長,今年賺1蚊,出年就會賺2蚊,後年就會賺4蚊,如此類推。好多時候,花旗國一個投資者究竟可以接受幾高「市盈率」,就取決於該公司多年以來嘅盈利增長,多數都會睇番對上四、五年。如果公司每年盈利增長有30%,市場普遍認為可以接受30倍市盈率,有1對1比例。
呢個現象可以解釋,點解花旗國科技公司出盈利報告嘅時候,只係比市場預測嘅盈利少咗小小,就會帶來股價大幅下瀉。原因係如果一路以來,公司都可以交出50%盈利增長,公司股價就有50倍市盈率。不過有一年公司淨係交出35%盈利增長時,市盈率就可能淨番35倍,即係股價可能跌30%。
大家可能會問:「咁對中海油又會點?」如果大家睇吓中海油要交嘅20億暴利稅,如果唔需要交,將暴利稅變番做盈利嘅話,中海油就大約賺咗180億。即係話由02年上半年至今,盈利每年有大約50%嘅增長。不過因為有暴利稅,06年上半年中海油盈利得番38%增長。如果中海油市盈率係50倍,而因暴利稅出現,中海油市盈率被推到38倍,股價即跌25%。都話過,好彩中海油市盈率得8.5倍!
最後,大家要謹記睇祖國石油股生產數據時,千祈、千祈唔好睇「油當產量」。「油當產量」係將原油同氣體天然氣嘅產量加起來,不過因為天然氣冇錢賺,所以就算再多生產都冇用。如果大家睇生產數據去預測盈利增幅,就要淨係睇「原油產量」就夠!
孫柏文