唔使問阿貴，大家都肯定知道現任英超最長壽教頭是執掌阿仙奴已19年零1個月的雲格，哪英超最長壽領隊第二位是誰？三、二、一……答案是：曉士！嚇一跳哩？2013年5月30日上任的曉士，執教史篤城才兩年零4個多月，同期上任的還有摩佬、柏歷堅尼與馬天尼斯。羅渣士在紅軍捱了3年幾原來已好叻仔！英超領隊越難撈，越令雲加的堅持更令人佩服。

教授近年一直飽受抨擊，之前9年無冠、一年賣一個隊長，球迷換帥呼聲此起彼落。其實雲格是為配合球會建新球場而勒緊褲頭，無佢，呢幾年會否更難捱？到季初，又有人狠批佢孤寒唔買前鋒，成歐洲五大聯賽中唯一無買外場球員（outfieldplayer）的球會。到上場3:0大勝屈福特，雲加說了兩點：一是近5仗攻入15球，「證明我唔買前鋒無錯」；二是：「我唔怕同大家講，阿仙奴已重返爭標行列！」再一次證明雲格的堅持、球會對他的堅持，很可能是對的。

現今球壇，費Sir這些一間球會渡過廿年的領隊生涯已是「文化遺產」；莫耶斯在愛華頓11年、柏祖在紐卡素6年這些「長命領隊」亦似乎難再出現。所以球迷應更珍惜雲格在位的日子。對拜仁的歐聯比賽，其實輸了可能更好，可疊埋心水爭聯賽。今季車仔「放棄衛冕」、曼聯曼城各有不穩時候，可能係阿仙奴偷雞最好機會！

文：方栢翹（now足球評述員）