翁靜晶同大女劉萬儀到金鐘出席「電影．社群．百年嶺南洪拳」展覽，因為萬儀要表演梅花劍，用咗三個月時間準備：「自己覺得唔夠時間練，但都會盡力。」

萬儀表示細個都有學武術，但出國讀法律之後就停咗。再練番會唔會好難？萬儀話：「唔難，都有信心嘅，一定會繼續練，因為爸爸（劉家良）唔喺度，自己都有啲壓力，因為想承傳佢嘅功夫。」翁靜晶透露劉師傅走後，劉家獨門武器三節鞭要搵掌門人承傳時，阿女提出想接棒，但翁靜晶就撥冷水：「阿女練習時要戴頭盔。」

因為三節鞭又重又長，頂部有個尖，就咁聽都知危險，翁靜晶話：「三節鞭加埋有120磅，劉師傅舞起上嚟好似羽毛，呢個兵器佔阿女人體重量好大，所以要考慮下，唔想佢變獨眼兒大戰江湖人物。」萬儀就話：「我變咗海盜都得㗎，我好有信心可以做到。」

翁靜晶話仲話：「其實呢個兵器係獨門嘅，當時英雄大戰筲箕灣時，阿爺劉湛做英雄，用咗三節鞭做武器，呢個係劉家獨門兵器，o依家阿女睇拳譜推敲番用法。不過自己都有啲擔心，因為個女有啲固執，佢話一定要試，睇下佢有乜下場。」翁靜晶坦言好欣賞同場嘅趙世光兒子、中華國術總會執行董事趙式慶：「心目中覺得阿慶最適合承傳三節鞭，因為佢夠高度，又有德行，就算送畀佢，劉師傅都會覺得適合，估唔到出現競爭對手，總之能者居之。」