夏日炎炎，望番個日曆，o依家先係6月尾，數數手指，起碼仲要捱多3個月嘅持續高溫天氣，先等到有少少秋意。

所以近排一到假日，唔少市民都擁去沙灘、泳池消暑，至於「肯雅徐」徐濠縈，噚日亦暫時放低佢至愛嘅跑步，換番件泳衣改到沙灘暢泳。而一向走喺時代尖「啄」嘅佢，今次就着咗件粉紅荷葉半截泳衣再加超高腰黑色泳褲，潮得嚟盡顯個性。