周四啟程去大灣區訪問嘅特首林鄭月娥，今日展開第二日行程，已經轉到珠海嘅佢，參觀咗珠海橫琴規劃建設展示廳，亦視察咗最快今年中通車嘅港珠澳大橋。日前多個外國媒體都獲邀參觀港珠澳大橋，而同樣有機會參觀大橋嘅娥特，就形容大橋係世界級工程，指參觀環節非常精彩同感動。

佢中午時就同珠海市委書記郭永航會面，話隨著大橋落成啟用，香港同埋珠海嘅距離會拉近，肯定會進入新台階，相信往後嘅香港人尤其係年輕一代，喺珠海嘅發展好有機遇。郭永航就希望進一步加強深化粵港澳合作。

娥特今日下午結束行程返港，嚟緊仲有三日復活節假期，唔知佢同老公林兆波有乜節目？