煲呔承諾阿爺香港會捐助巨款幫四川災區重建，立法會通過首階段撥款廿億元，政務司司長唐英年帶埋孫公、周一嶽、林瑞麟同曾德成四個局長，日前去四川考察如何展開重建工作，幾名高官身在災區，噚日下晝突然傳來當地再有餘震消息，成都、西安、綿陽感到強烈震動，群眾紛紛上街暫避，成班香港高官又點呢？

協助重建保育區

八方致電四川查詢，隨行人員話發生餘震時佢哋身處碧峯峽，應該離開震央幾遠，所以感受唔到震動，行程冇受影響。港官經歷官場大地震就多，未必承受得到真正天災，佢哋今次肩負協助重建、援助災民任務，相信就算發生更強烈餘震，都唔敢即時逃難返港丟低災民條條fing。
香港人成日話同內地同胞血濃於水，捐錢賑災都要睇到實，港官與四川人一齊面對餘震，先至顯得有承擔，留得越長時間越顯得共患難誠意，就算好似俾酒店趕走嗰班友咁條條fing，流落街頭都無所謂啦。
唐英年之前話唔想旅客條條fing，所以安排嗰班友到社區中心留宿，四川大熊貓基地震到散晒，多隻大熊貓正一條條fing流離失所，唐英年一視同仁，唔想嗰班熊貓條條fing，噚日視察雅安碧峯峽大熊貓中心後，表示已同四川省達成共識，首階段會協助重建卧龍保育區同通往映秀與卧龍嘅道路，又話兩地會有工程驗收、評估機制，確保資金用得其所。
重建卧龍基地預計要兩、三年時間，唐英年稱會同海洋公園合作重建有關設施。
mailto:[email protected]