內地最大商業地產商大連萬達（3699）嘅上市計劃正式開波，噚日在港舉行投資者推介會，喺財經、體育與娛樂界都好吃得開嘅萬達老闆王健林亦有現身香江，雖然王健林好少來港，但係大家望多兩眼，會唔會發覺王健林好面善，好有親切感呢？覺唔覺得佢同甘草演員江漢有七、八分相似呢？
王健林與江漢嘅五官與面形都似，兩人嘅兩邊面都有啲肉地，又紅光滿面，最似就係髮型，兩人嘅M字髮線完全一樣。

呂耀東同中大教授如餅印

實際上，江漢年紀大過王健林15年，今年已經75歲，佢之前係大台嘅甘草演員，每年都有幾套劇見到佢演出，最有印象係佢帶住些少外省音嘅廣東話，有時佢會飾演有錢人，都好有富豪氣質㗎，如果佢同王健林可以企埋一齊影張相，效果應該好過癮。
王健林年輕時曾經從軍，後來從商，最初做地產，之後越做越多瓣數，近年亦有涉足電影業，將來佢如果想搵人拍套自傳式電影，不妨考慮搵江漢喇。
除咗王健林與江漢，財經界入面亦有好多人有相似嘅例子，好似銀河娛樂（027）太子爺呂耀東，中大社會系有位教授Eric Fong好似佢。中播控股（471）主席黃秋智亦有幾分似長實（001）樓神趙國雄㗎。最經典就肯定係前高官馬時亨與行會成員林健鋒喇。

李華華
mailto:[email protected]