多年前嘅緋聞情侶——鄭嘉穎同佘詩曼,今日現身將軍澳電視廣播城,為無綫拍攝宣傳照片。雖未有同場合照,但兩人喺化妝間見面時,都有講有笑,氣氛融洽。
話明專注發展內地市場嘅佘詩曼剛簽TVBC,隨即為無綫落力宣傳,又承諾一年拍一部無綫劇,佢表示自己向來都好聽話,仲預計喺出年1月會為無綫開拍新劇。阿佘表示知道無綫近期力邀好多猛人入電視城拍劇,如影帝黃秋生同梁家輝,佢話: 「我梗係想同佢哋合作,可以同佢哋學野,不過劇本都係會公司揀。」
同樣專注內地市場嘅鄭嘉穎,得知阿佘回巢、一年拍一套公司劇,竟然主動力邀阿佘合作,更表示見面沒尷尬: 「如果有機會都期待,阿佘係一個非常專業(嘅演員),返嚟實有機會,咁就要撞一撞,我出年都會返嚟。」
當年兩人因為拍《法證先鋒II》撻著,更導致嘉穎同周麗淇分手,兩人一直暗交。有次打八號風球,鄭嘉穎揸車載阿佘返回其南圍村屋途中,因為水浸致火,一眾村民嚟幫手,點知就發現阿佘尷尬地縮一角,戀情亦因此曝光,可惜交往兩年,都係分手收場。雖然事隔唔係好耐,但就令人覺得好似恍如隔世咁,不過再見亦是朋友,兩人落落大方,實屬難得。