日政壇突然盛傳唐唐劈炮唔撈，提前準備熱身選特首，唔肯再屈就幫煲呔做財爺抬轎，結果搞到八方同啲行家好緊張，有記者走去搵唐唐嘅新聞秘書羅志康求證。
佢老兄初時覺得呢啲傳聞得啖笑，梗係即刻否認，但愈夜就愈多傳聞，啲消息仲傳到好鬼勁，震撼程度有如步步高槍擊案，結果搞到羅志康好緊張，午夜追call各大傳媒機構，澄清唐唐仲健在、絕對冇腳痛辭職，叫大家唔好信啲傳聞，相信有人別有用心，喺四月一日愚人節搵佢老闆講笑！
政府高層辭職呢類咁具震撼性嘅消息唔係成日傳，淨係老董落台之前傳過，噚日無端端又傳出類似嘅嘢，睇嚟背後肯定大有文章。話晒唐唐兩、三年前接任財爺時，都係特首嘅熱門人選，就連代表老左嘅福建蔡菜子都話，如果老董早一年落台，唐唐絕對係接任人選，但自從北京欽點咗煲呔，佢個大靠山江澤民又全退，唐唐嘅賠率即刻急升，由大熱變咗大冷。

卧薪嘗膽　下年片過

如果北京肯承諾，煲呔做七年收皮後由唐唐接棒，佢都可以幫你捱多五年義氣，但北京又唔肯講，唐唐留喺政府度又冇權又要受氣，反正佢大把錢唔使憂，不如返去飲紅酒好過啦。再唔係就卧薪嘗膽，提早熱身起步拉票，預備下年同煲呔片過。
唐唐今次高票搞掂預算案，雖然坊間反應麻麻，但總算交到貨，聽聞唔少商界都想支持唐唐同煲呔一較高下，就算下屆做唔到特首，都可以做政務司司長，坐多五年就名正言順接任啦！
不過，煲呔一直對唐唐好有戒心，話唔埋有一日煲呔坦白同唐唐講，你下年留喺度都冇政務司司長做啦，不如自己辭職啦！


爆料熱線：29290000、27860099
報料傳真：26239278
報料電郵：[email protected]