求學時派成績表總是有人歡喜有人愁，上市公司公佈業績都係異曲同工，華華統計咗48間恒指成份股嘅全年業績，當中32間有增長，16間倒退；一眾高薪厚祿嘅高層，睇嚟都係諗住好天斬埋落雨柴，因為有成25間要減人工呀。
邊位高層最抵請？肯定係工商銀行（1398）董事長姜建清，皆因喺《福布斯》全球企業排名第五的工行，舊年贏到開巷，純利2083億人仔，按年增長26.1%，而姜總嘅人工只係111.7萬人仔（137.4萬港元），佔公司純利0.0005%，或者係百萬分之五，認真抵到爛。

思捷CEO　人工佔純利七成

至於最唔抵請嘅，相信都唔使估，咪就係思捷（330）嘅CEO范德施囉，思捷舊年純利時光倒流18年，只係賺7900萬，業績差之餘股價仲狂跌，去年股價跌逾七成，當大家都覺得佢最有機會被踢出恒指成份股之際，范德施竟然穩袋5763.8萬，高踞藍籌高層第六位，佢嘅人工佔純利72.9%，都咪話唔過份。
如果講最高人工嘅，都冇第二個喇，梗係和黃（013）大班霍建寧，霍生收得好貴就係人都知，之不過佢今年加咗幾多人工呢？單喺和黃，若果齋計董事薪酬的話，佢就加咗一成人工，至1.7億元。咁即係幾多？假設有打工仔每日返八個鐘，返足365日攞埋最低工資28元，如果想逗到霍生份年薪，就要做足2079年囉。
排第二嘅係滙控（005）CEO歐智華，總酬金715.6萬英鎊（約8970萬港元），當然同霍生冇得比，但同樣情況，都要打足1102年先可以搵到呢9000幾萬，舊年獅子行頻頻喺香港同歐美等地開刀裁員，歐智華雖然舊年減薪近一成半，但都搵近億，唔知獅子行長期粉絲滿唔滿意呢？

李華華
mailto:[email protected]