韓國綜藝《RunningMan》主持劉在石，今朝拍攝另一綜藝《無限挑戰》「2014KoreaSpeedFestival」半職業組嘅決賽時，再次發生車禍。

比賽中段時，劉在石因車輛失控撞到圍欄，被迫淘汰出局。

好彩劉在石本人無受傷，佢喺工作人員陪同下坐其他車離開賽道，不過佢望住架失事車輛時，仍難掩失落。

上星期，劉在石練習賽車時已經因為車輛撞到圍欄而發生事故，但佢仍堅持練習同參賽。喺噚日嘅預賽中，劉在石又因為賽車故障而包尾。

今朝早，佢本來雄心壯志咁表示會全力以赴，希望有好成績，仲貼心咁向記者派水消暑，表現得淡定又自信。

可惜事與願違，劉在石離場前只能強忍淚水，擠出微笑感謝在場粉絲嘅支持。不過佢體育精神可嘉，喺粉絲心目中已經贏哂。