當年今日
關於我們

南華2元老感慨良多

蘋果日報 2003/06/15 00:00


對南華球員來說,今個暑假可能比過往「難過」一點,因為南華高層決定改以「全華班」,球員悉數要再度減薪;對於會方這個決定,兩位南華「元老」歐偉倫及丘建威可說感受良多,前者擔心此舉會進一步打擊低迷的球市,而「阿丘」則希望南華球迷諒解目前的處境。

阿倫:全華班料難交成績
「南華作為本地最大球會都決定唔理成績,清一色用晒華人,呢個決定嘅影響及牽連可能好大。雖然球迷愈嚟愈少,但南華仍然係最有號召力嘅球隊,所以預期,如果南華來季真係未能交出成績,點都會影響球迷嘅入場興趣。」
「阿倫」又謂:「南華始終是南華,球迷對球會點都有啲要求,而以目前人腳實在幾難預期交到成績,估計會方及球員喺季內要承受很大壓力。由於踢了南華多年有了一份感情,所以才接受減薪,但年年減薪,肯定會影響球員心情。」

阿丘:年年減人工點會開心
「南華今次的決定,引起外界幾大回響,好多人見到我都問,南華都咁呀!我覺得今次嘅決定會有幾深遠的影響。會方這個方針是值得支持,事實上要搞好足運,青訓好重要,只係青訓需要好長時間,同整體環境配合!」
「既然會方已經定咗長遠培訓嘅方針,球隊會有一段幾長時間嘅艱難時期,南華球迷要諒解同畀啲耐性。講真又減人工,球員點會開心,只係冇辦法下接受,相信下季唯一好處係響經常受壓之下,會有好多表現嘅機會。」