【親手剪臍帶】羅仲謙棹忌唔讚小珍珠靚女 改口叫「臭臭豬」
蘋果日報 2020/04/22 19:44
楊怡羅仲謙小珍珠
採訪：卓寶花 攝影：陳慧安- 羅仲謙今日在中環開工，透露囡囡小珍珠上周四出世。
- 他在學湊B，不過自言粗魯，驚扭到BB手腳。
- 囡囡是羅家第一個孫，家人都好專心湊BB，未諗百日宴事情。
- 楊怡在IG發佈一家三口的合照。
楊怡今日宣佈寶貝女「小珍珠」出世，老公羅仲謙在IG感謝楊怡，覺得簡單一句「辛苦了」未能形容女性十月懷胎中的付出。楊怡現時已經返屋企坐月休息，而羅仲謙就要開工搵奶粉錢，他今日傍晚在中環為新劇拍攝外景，他受訪時形容現時心情開心興奮，又透露小珍珠上周四（16日）出世，他說：「比預期早咗十零廿日，聽醫生建議開刀。因為出世時未夠6磅，屋企人話佢似珍珠仔，所以叫小珍珠。」
通常BB出世似父母，不過羅仲謙就指囡囡似自己家姐，當記者讚小珍珠靚女，羅仲謙竟然拒絕接受：「哎呀，唔可以讚㗎，雖然我成日都忍唔住讚，但我外母都叫我唔好讚佢靚囉，要叫佢『臭臭豬』、『曳曳』，個女真係令我好掛心。」小珍珠出世一刻，羅仲謙說比想像中感動：「有喊，過往係隔住太太個肚去感受BB，而家可以抱住佢，同埋第一下抱起，BB身上仲有液體，感覺好溫馨。」當然，他都非常識做，第一時間都有錫返老婆。
羅仲謙之前有請假陪產，他透露有時開完工亦要趕去醫院，至於開刀生產當日，羅仲謙都有陪住楊怡，並親手剪臍帶：「我入去產房都成身裝備，心口掛晒DV、相機。」他又笑說：「我都拍得多醫生劇，冇手震。醫護問我得唔得，我都話應該得啩，同拍戲差唔多啫。」
羅仲謙透露囡未改名，要交由長輩決定，但就有個希望：「筆劃唔好太多，第時要罰抄好辛苦，淨係『羅』字都好多。」自覺粗魯，現時要學習湊B：「學緊餵奶同換片，今日返工都遲到，想睇埋阿女飲奶先出門口。」他每日仍有影低BB相：「BB收緊水，每日變化好大，日日都影低BB樣，等佢第日嫁就多啲武器。」他表示小珍珠有飲人奶，亦都有飲奶粉，屋企人亦因為太專心湊女，未有考慮百日宴的事情，相信不會太鋪張。問到會否追多個，羅仲謙說：「未得住！醫生話最快要半年至九個月。」