【樓上有鏡頭】澳洲警方監測鏡頭 揸車用手機影相做證據
蘋果日報 2019/09/27 00:03
罰款澳洲手機鏡頭監測犯法駕駛者
除了醉酒駕駛，在駕駛時用手機都係導致意外發生的重大因素。雖然駕駛時用電話屬犯法，不過可能你都會在路上見過，有人照講電話、玩電話、入訊息甚至打機，亦有人以為開擴音器唔放部電話喺耳仔旁就冇事，其實統統都唔啱。但要嚴懲的話有甚麼辦法？始終要斷正先有用，咁香港警察近排又話人手唔夠喇。
澳洲New South Wales就研究使用監測相機，可以探測到駕駛者有沒有用手拿着手機，如發現就會影相，兩個鏡頭一個影車內情況，另一個就影車牌，有相有真相，稍為有人性都冇得抵賴啦？早前當地就用六個月都進行測試，總共監測過超過850萬部車，當中有10,000位司機被拍到駕駛時用電話。
經過測試之後，當地政府亦決定會引入45部「Mobile Phone Detection Camera」裝置於不同路段，預計在今年12月前裝好。可能你會問，咁如果我唔係用手玩緊電話，而係做緊其他嘢又被影咗相咁點算？警方於寄出罰單前會用肉眼確認。講多少少，喺澳洲駕駛時用手機，罰款$344澳元，千幾接近二千蚊港紙，去自駕遊要小心。
撰文：Michael
編輯：鄒仲安
編輯：鄒仲安
你以為冇人知？其實上面已經有鏡頭影緊你！
有冇人咁蠢明知有鏡頭都做犯法嘢呀？有囉，如果唔係年中邊有咁多人被影快相。
兩個鏡頭，一個影車牌，一個影車內。