【玩新郎最好睇】羅仲謙飛身撞吳卓羲屁股 豹哥夾耳仔又夾脷
羅仲謙吳卓羲玩新郎豹哥
今日羅仲謙同楊怡結婚,謙仔同埋班兄弟喺Ritz-Carlton酒店大喜日子又點少得玩新郎呀!
接受訪問時,謙仔已經透露咗姊妹團好順攤,冇數過開門利是就「放人」。同埋啲遊戲都比較容易,喺相入面都見到,只係要求謙仔同啲兄弟將腳放入冰桶入面。謙仔仲有提過,其中一個環節係要「食尿片」,不過呢個遊戲就俾豹哥「破壞」咗,因為本身個遊戲係要豹哥玩㗎,不過豹哥一下就將塗滿朱古力嘅尿片,「質」落康華塊面到,用「暴力」過咗關。
不過謙仔一開波入門口嗰下都有啲難度㗎,班姊妹將個呼拉圈掛喺門到,要班兄分抬起謙仔,穿過個圈先可以入門口。有個遊戲係將氣球綁喺兄弟身上面,羅仲謙要飛身撞爆啲氣球,而被撞嘅就係吳卓羲,搞到個畫面有啲hehe。之後仲要用衫夾夾耳仔,豹哥仲俾康華用衫夾夾脷o添!最後謙仔要用腳喺冰桶麻雀,一腳夾「一索」,一腳夾「南」,喻意一索得男!