Netflix首部華語自製原創影集《罪夢者》今日喺台灣舉行記者會，主演嘅張孝全、賈靜雯、范曉萱、劉子千等都有現身撐場，張孝會同賈靜雯喺劇中演一對有名無實嘅夫妻，賈靜雯生仔當日，張孝全入獄，長達10年，全個故事由張孝全囝囝被綁架開始，身在獄中嘅佢一心策劃逃獄，拉開故事序幕。

而幫張孝全照顧老婆賈靜雯嘅劉子千，喺記招上直言自己頗識照顧人，暗示自己同賈靜雯會有條感情線，賈靜雯笑言好期待劉子千嘅表演。大會更安排佢哋兩個對望10秒，測試會唔會容易笑場NG，好彩兩人順利過關。

至於范曉萱就着住對高踭鞋出場，見佢行路有啲慢，仲有啲太后嘅壓場感，佢話自己演一名黑幫大哥嘅女人，但佢自嘲「氣勢都假的」，仲話當導演搵佢演個「性感妖嬌的女人」，范曉萱坦言有啲意外，因為佢覺得自己唔係嗰個feel，經再三確認後，決定學着住高踭鞋行路，仲應導演「屁股要扭」嘅要求，先捉到妖嬌嘅感覺。

至於張孝全就話為咗今次呢個黑幫大佬角色，特登跟導演去做調查，識咗啲真嘅大佬，向佢哋偷師。另外，由於呢套係網劇，尺度比較大膽，亦已確定有裸露鏡頭，但導演陳映蓉話會留番啲裸露戲俾男演員們。

精選娛聞，喺晒《娛果》
http://fb.com/appledailyent