又到年尾，係娛樂圈總結一年成績嘅時候，不過大台今年就將頒獎禮押後到1月先舉行。今日頒獎禮公佈提名名單，女主角們好似有啲忙，淨係得江美儀、黃心穎、蔡思貝、黃智雯、薛家燕同鮑起靜有到。

江美儀啱啱已經上過台，事關佢喺女配角有提名，佢話呢次有份爭女主角：「諗住喺少女時就有提名，點知要到做人阿媽先有得提名，記住支持阿媽。」江美儀又抽水話：「新抱仔好多票㗎，馬國明啲票過晒俾佢！」不過黃心穎就話唔使啦，支持何遠東嘅嘢，點知佢又俾何遠東擺枱，話自己係支持馬國明。

家燕姐憑《燦爛的外母》獲提名，繼續搞笑咁講：「多謝度身訂造《燦爛的外母》俾我，不過呢個角色非我莫屬，我行出嚟，個種燦爛都冇人頂得住。」佢仲話訂製咗件登基衫，準備頒獎禮着。

至於第一次喺TVB演出嘅鮑姐，第一套劇《同盟》已經有得入圍，佢話：「好開心，接《同盟》係一額汗，第一次嚟到TVB就有機會，仲可以入圍。」而佢話支持俾易生先，即係今年好有話題嘅歐瑞偉。

每年台慶劇都有優待，只係播咗10集未夠嘅《溏心風暴3》，已經有4個提名，包括李司棋、關菊英、米雪同岑麗香。而唐詩詠噚晚就喺「Yahoo搜尋人氣大獎2017」贏咗個電視女藝人大獎，憑《不懂撒嬌的女人》攞頭彩，爭番啲聲勢。

提名名單：
林夏薇《乘勝狙擊》
陳敏之《親親我好媽》
江美儀《親親我好媽》
田蕊妮《迷》
黃心穎《與諜同謀》
陳松伶《全職沒女》
宣萱《不懂撒嬌的女人》
唐詩詠《不懂撒嬌的女人》
蔡思貝《踩過界》
鮑起靜《同盟》
胡定欣《同盟》
薛家燕《燦爛的外母》
湯洛雯《燦爛的外母》
黃翠如《使徒行者2》
黃智雯《雜警奇兵》
李佳芯《誇世代》
李司棋《溏心風暴3》
關菊英《溏心風暴3》
米雪《溏心風暴3》
岑麗香《溏心風暴3》