韓國6人女團A Pink噚晚喺亞博館舉行《2017 Apink Asia Tour [Pink UP] in Hong Kong》演唱會，吸引4,000粉絲到場支持。雖然演唱會因安全檢查問題一直延遲，比原定時間遲咗80分鐘先開始，但依然冇損粉絲心情，A Pink亦晒腿現身，落力演出，不時大晒廣東話，更去到台下近距離同粉絲接觸。

A Pink獻唱《Five》及《Kok Kok》後再唱出兩首慢歌，引起粉絲尖叫，成員尹普美又以廣東話叫粉絲嗌大聲啲，及後就提到6位成員嘅近況，孫娜恩早前飛到紐約出席時裝周，普美就搞鬼叫娜恩做模特兒行Cat Walk，娜恩亦行得有模有樣，但似乎依然覺得怕醜，最後小碎步跑返轉頭，普美更起哄叫埋其他成員行。提到今年已經係出道6周年，A Pink送上特別歌曲《Always》畀粉絲，粉絲亦喺台下高舉彩色汽球應援。

A Pink換衫後連唱《My My》、《Mr. Chu》、《LUV》三首熱門歌曲，普美表演《My My》時不慎跌親，好彩冇大礙，不過佢就因為太尷尬而坐喺地下傻笑，要由鄭恩地扶佢起身，恩地就叫粉絲唔好將佢哋失誤嘅相或短片放上網，相當盞鬼。之後A Pink喺粉絲寫嘅字句中，揀出適合自己嘅單詞，娜恩獲粉絲大讚係「天使面孔，魔鬼身材」，恩地就係「撒嬌女王」。

而港迷為咗令A Pink有難忘嘅回憶，當A Pink獻唱《Cause You’re My Star》及《Only One》時，粉絲分別高舉白色手燈及紅色玫瑰花燈，應援物品準備豐富，令A Pink大表感動。

安哥時，A Pink驚喜喺台下現身表演《No No No》，近距離冧粉絲。6位成員逐一發表感想，表示今次港騷係好好嘅回憶：「上次來港係海外巡演嘅尾場，今日就係是次海外巡演嘅首場，可以同粉絲見面真係好開心。但因為好耐冇開騷，準備嘅時候都好緊張、擔心會有失誤，不過見到粉絲咁努力為我哋應援，我哋可以放鬆地演出。」

A Pink又指粉絲由開場到安哥都係充滿力量咁為佢哋應援，恩地笑言下次可以開通宵演唱會，6位成員更多次以廣東話「多謝」、「我愛你哋」、「你哋好勁」、「我會掛住你哋」感謝粉絲。A Pink與粉絲影大合照後，螢幕播出粉絲準備嘅短片， A Pink睇到眼濕濕，普美及初瓏一度要用紙巾抹眼淚，最後A Pink以《The Wave》為逾兩小時嘅演唱會畫上句號，臨離開時A Pink亦多次鞠躬及揮手向粉絲道別。