名模周汶錡（Kathy）去年7月為法籍靚仔老公Julien誕下混血囝囝Jacques，Jacques眼大鼻高，屬典型靚仔混血兒。對住可愛精靈囝囝Jacques，Kathy曾經講過：「自己少少變態咁，有時抱住佢，真係唔想放低，好得意呀！」Jacques可愛到一個點，媽媽Kathy朝朝狂咀囝囝，夜晚抱住不願放。早前Kathy已透露有意今年再追多一個小情人！
坐言起行的Kathy，昨日透過經理人公司宣佈懷孕五個月，她表示：「跟大家一起分享我們的喜悅，Jacques快要做哥哥了！」同時附上一張自己穿白背心加牛仔褲的相，與媽媽母子裝的Jacques，伸手摸着媽媽開始凸凸哋的肚仔。

明年4月預產期

經理人Simon透露Kathy正與友人在巴黎，今天才回港出席聖誕活動，而老公Julien昨日透過短訊回覆表現興奮，問到仔定女時，他說：「相信Kathy想保留神秘感，我仔女都好開心，只要BB健康便可，對我來說，這是最好的聖誕及生日禮物。」Julien指太太身在巴黎買BB衫，提到預產期，他透露將會是明年4月初。問到有否教Jacques做哥哥？他說：「將會教囝囝要學分享及保護妹妹或弟弟。」而Kathy胞妹周麗淇受訪時也說：「好開心！屋企人知咗好耐，家姐已經有個小王子，希望佢生個小公主，同家姐一樣咁聰明靚女，多謝大家關心！」
採訪：唐如、皓騫