當年今日

股壇瀏覽器:惠揚傳遭人狙擊

蘋果日報 2002/01/25 00:00


惠揚控股(231)噚日大跌74%後停牌,傳聞版本甚多,但其中比較可信係曾文能持股被證券行斬倉。
i師傅話,被斬倉嘅股份已被一大戶接下,會繼續收集並成為惠揚新主。佢重話,若大戶成功收購惠揚控制權,此股就會有動作跟尾,可以留意小敲,不過千祈唔好博老命,如果大戶攞唔到控制權,你叫佢點做嘢?或者隨時會讓埋個大股東畀你做。

衝浪平台向下衝
衝浪平台(8178)噚日急跌,跌破1元,收0.86元,跌幅達24.5%,成交5260萬元。衝浪平台大約由0.40元水平炒上嚟,喺咁高位散貨,下跌空間非常大,有貨要小心。文化傳信(343)亦唔好得去邊,噚日被質低9.5%,收0.43元。
媒體世紀(8160)噚日掛牌,初時德意志都有入市頂價,令跌幅維持喺7-8%,其後連德意志都有棄守迹象,令跌幅擴大至15%,收2.20元。
據聞圍飛班友唔係好齊心,若此股在兩日內都未能反彈,包銷商嘅護價陣形就會瓦解。
慶鈴(1122)噚日突然大升9.2%,收1.31元。e莉莎話主要係因為日圓貶值,大行調高盈利預測。市場一般預期日圓會跌至140-150水平,即係話隻股嘅盈利預測會繼續被調高。
不過,現時國內汽車價格已開始下調,國內汽車股基本上係中國入世嘅受害者,所以唔排除有大戶會借好消息抽高,然後散貨。