近排嘅教院風波聆訊唔單止峯迴路轉，仲好有教育意義，除咗話畀大家知學術自由係好重要嘅原則之外，跟開呢單新聞嘅市民，仲可以順便學埋英文，例如rape係點解呀咁。不過，市民冇因為咁而向阿瑟王saythankyou，噚日佢仲同林公公雙雙當選中產人士「最想叮走嘅局長」，認真慘情！

通常政治人物民望插水要補飛，不外乎嗰幾招，都係搬老婆仔女、老竇阿媽出嚟sell溫情之類。阿瑟王最近同大佬寶哥哥一齊接受紅十字會嘅會訊訪問，就大談當年兩兄弟跟住媽咪去做義工同捐血嘅童年往事，力sell乖仔形像。
話說流住blueblood嘅阿瑟王出身名門望族，家境梗好啦，但佢媽咪李福樹夫人都好體恤民間疾苦，45年前已經為紅十字會勞心勞力，仲日日去醫院幫手整棉花球。香港地以前搵食艱難，冇乜人捐血，身為長子嘅寶哥哥一滿17歲就俾媽咪捉去獻出第一袋血，雖則流血不流淚，但就話捐血者獲贈嗰杯飲品「真係好難飲」。據聞杯嘢係橙色，但成份就冇人講得出，聽講用嚟補充體力好有效，但可能太多人飲唔落，紅十字會都要換貨，𠵱家捐血之後有橙汁或者即沖飲品任揀，仲有大把梳打餅慢慢歎。

至於當年未夠秤捐血嘅阿瑟王，就加入紅十字青少年團，幫手喺街度追住人叫人捐錢。大把身家嘅佢仲好感觸咁話：「寫張支票，用金錢資助人道工作是一件十分容易辦到的事，但社會需要的不只是寫支票這個簡單動作，而是衷心助人的心。一個人成敗不應向錢看，更重要是看他的心。」
喺上星期嘅教院聆訊度，唔只阿瑟王嘅舊拍檔「教統局女王」羅范被指點名要教院炒人，教院校長莫禮時仲話，阿瑟王曾經用2億資助，「利誘」教院同中大合併。唔通阿瑟王咁講係有感而發？佢成世人食飽無憂米，開支票梗係當食生菜啦，但如果個payer係政府庫房就唔同咁講喇。
不過咁，個聆訊仲未完，真相係點仲未知。學阿瑟王話齋，最重要係問心嗰句，八方都希望，所有喺聆訊作供嘅人都本住自己個良心，講出真話，咁就真係衷心幫香港喇。