經紀陳呢排好似特別鍾意印刷股,除咗舊年年尾推介鴻興(450)外,今年年頭又推介星光印刷(403),當時做緊0.465元,事隔唔夠4個星期,上周五股價已經升至0.62元,累積升幅33.33%,小初真係甘拜下風。
經紀陳笑笑口話,近年好多印刷公司業績都唔錯,加上呢排流行炒工業股,所以股價上升係正常事。今次佢又有新介紹,就係勤達印刷(1172),佢話新炒家接手無耐,股價只係剛剛起步,仍有留意價值。
勤達02年上半年度,營業額雖然下跌13.9%,只有2.06億元,但盈利就上升30%至1300萬元,所以亦有炒作概念,最重要係勤達幕後炒家與星光源出同一系人馬,估計作風亦會近似。
不過,小初仍有啲擔心,因為勤達屬於莊士中國(298)一系,按以往多年經驗,要賺呢一家人嘅錢,真係難到不得了,所以仍要諗一諗。
慕容小初