踏入仲夏，似乎係見客會友好日子。中聯辦開門見民主黨，建制派前日夜宴特首煲呔，總之你有你講數，我有我箍票。前晚席設中環上海總會，主菜卻唔係濃油赤醬本幫菜，而係煲呔同反對派領袖余大狀嘅辯論。建制派中人對呢場大辯論得個睇字，塘邊鶴紛紛獻計畀煲呔，助佢揮低余大狀。

被指臨場表現高危

八方綜合多名建制派議員意見，幾乎一致認為煲呔講政改方案內容唔會輸，不過臨場表現卻十分高危，因為佢慣性開口夾着脷，出席特首答問大會時失言瀨嘢場面屢見不鮮，面對牙尖嘴利余大狀，主動單挑似係兵行險着，贏面唔高。
飯局之際，建制派議員你一言我一語，向煲呔傳授三招辯論必殺技，聲言若煲呔依計使出，勝算大增。
第一式係陪笑。正如葉劉話齋，辯論對手係女流之輩，煲呔最忌表現得冇風度，如果令人覺得佢蝦女人，得分肯定打折扣。至於如何陪笑，煲呔唔使人教，好似見到領導人咁就得。
第二招由民建聯提出，就係黑面。眾所周知煲呔EQ有幾高，要佢刻意保持笑容分分鐘有反效果，倒不如以真性情、真面目見人，唔啱聽嘅話，即時黑面對住余大狀，總之做番自己最好，話晒輸人唔輸陣吖嘛。

有樣學樣隨時出事

最後一式集各家所長，皆因成班塘邊鶴都認為煲呔隻揪余大狀，贏點數冇問題，技術性擊倒有難度，因此去到緊急關頭、最後機會，必須出絕招！
絕招是甚麼呢？八方連番追問建制派議員，可惜冇人口疏爆料，幾經艱辛，終於套到料。據不願透露姓名嘅議員透露，絕招之謂絕招，非到狗急跳牆時不可用，一旦煲呔被逼入窮巷，為爭取民意支持政改方案，惟有淚灑當場，以淚水打動全港市民，特首聲淚俱下呼籲市民撐政改方案，怕且香港人唔會咁鐵石心腸，視若無睹啩。
出到貓哭老鼠呢一招，煲呔都算無所不用其極嘞。只是建制派隨口噏，當秘笈，煲呔有樣學樣分分鐘出事，事關流眼淚係公民黨強項嚟o架！
mailto:[email protected]