【本報訊】第六屆全港運動會（港運會）開幕典禮於上周日在紅館舉行，並由單車運動員李慧詩和羽毛球運動員伍家朗帶領十八區運動員進場。不過燃點聖火的環節，卻由李慧詩和伍家朗傳遞火炬予里約2016奧運國家金牌跳水運動員陳若琳和林躍，為港運會燃點聖火，有議員斥由香港舉辦的運動會，卻由內地運動員燃點聖火，可見港府對本港運動員不尊重。

本地運動員極速被請走

議員羅冠聰指燃點聖火是地位出眾的任務，「香港舉辦應該搵返本地運動員，香港人睇電視以為香港冇好嘅運動員，先去搵大陸運動員，但其實香港有好多好好嘅運動員；如果因為話港動會係慶祝香港回歸20周年大型活動之一，所以搵大陸，更加講唔通，回歸係咪要搵埋英國運動員？」
開幕典禮邀請多名運動員分享，包括李慧詩、歐鎧淳等人，但上台不足一分鐘便被司儀請離台，換來負責直播的電視台的演員，鄭俊泓及胡鴻鈞演唱多首歌曲，包括《紅日》及《壯志驕陽》等。
有參加港動會的趙先生批評開幕禮流程，指港府「將運動會商業化，而不是『全港運動』，（入座率）效果係反映出佢做咗咩嘢」。
■記者梁佩珊