雷神莫雷拉已錄得連勝36個賽日，佢贏馬根本唔係新聞。再數落去，原來愛爾蘭籍騎師郭能亦連贏六日共擸九Win，包括剛於雞年賀歲賽起孖，兼憑「幸福指數」捧走百周年短途盃，另有一次谷戰（1月11日）中三元。加上郭能在近四次谷戰都有馬贏，合共勝出七場，所以本周四晚雞年谷草首戰，除了捧莫雷拉，郭能這位旺人亦要加倍留意。

郭能今期座騎唔多只得四匹，但普遍都有分量，數最大餐士必數第八場三班1650米「加州再豫」，上場郭能初接手跑谷草一哩同程，即造1分39秒82快時間贏馬，今次原庄配搭再來，分分鐘由猴年贏到雞年。

另外，第四場四班1650米之「搵銀天皇」季內四戰獲冠季殿各一，大熟大勇，只有上仗配吳嘉晉才失前四名，今戰加強配搭初用郭能，話唔定可擦出火花。