傳媒前路難行

狼振英前競選辦副主任紀文鳳，前日喺電台不點名批評「三報一刊」，八方真係巧京京，擔心離清算之日不遠矣。
八方心諗，狼英希望拉嘅傳媒名單當中，頭號目標可能係《星島日報》啦，事關佢哋集團主席何柱國曾開過記招寸爆狼振英，前線女記者又曾俾隻狼點相批評問問題大聲，令佢冇晒面，應該幾高危。
另外呢，《蘋果日報》擺明唔啱就出聲，八方版前主管畢明幾年前曾俾隻狼尋過仇；老總沙膽虹都寫過唔少文章砌豬又砌狼，睇怕都相當高危。不過沙膽虹早排都寫過，核心價值一旦被衝擊，港人會激昂捍衞，所以使乜驚！
至於另一「報」，應該係《信報》，狼英未登天子位，西環已經代為出手，打畀集團老細「勸勉」一番，相信同業打後五年嘅路都好難行，但大家記緊要迎難以上呀！

地產商率先受靶

有人話豬狼之戰，同時係一場地產黨對共產黨之戰。第一回合立法會投票立案調查「西九門」，地產黨KO咗共產黨，但係finalround都係共產黨贏，成王敗寇，咁班地產霸權難免會被隻狼清算。
現眼報出現咗啦，上星期老廉高調拘捕新地郭氏兩兄弟，心水清嘅老友話郭炳江同郭炳聯係提名唐英年㗎，但大K郭炳湘就提名隻狼。呢單政商界大風暴會有乜結果？真係要拭目以待。
另一個一直唔撐隻狼嘅大地產商，就係長和系嘅首富李超人。首富佢不單止提名咗隻豬，仲喺選前幾日，講明會繼續支持唐英年。投票嗰日又企硬撐唐，謝絕跳船。呢份堅持贏得唔少網民尊重，但結果李氏力場失靈，隻狼最終當選。不過，首富應該唔使驚被清算，皆因佢係超人，能直通天庭，後台一定勁過隻狼。

政界人人自危

小圈子選舉搞到建制派大撕裂，想有大和解？赤柱見啦！
政壇「希望拉的名單」，排首位相信係特首辦主任梁卓偉。無他嘅，西環太上皇曹二寶早前向佢施壓，要佢喺「西九門」放軟手腳。事件被揭發，有份觸發4.1遊行，呢個仇，振英哥點會唔報？
其實，本來頭號目標係肥龍許士仁，佢一直係唐豬競選嘅幕後軍師，最初又借出愛將鄭麗敏幫隻豬做公關。隻狼上位後，咁啱肥龍就俾雪糕佬拉咗，係咪巧合？大家心照啦。
除咗高官人人自危，政黨中人亦要小心。自由黨最令人擔心，創黨主席李鵬飛十年前已講過，如果狼振英做特首佢就要移民。榮譽主席田北俊好似頂心杉咁，周不時寸隻狼，成班領導層甘冒忤逆阿爺嘅大不韙投白票。
難得自由黨副主席周梁淑怡夠豁達，噚日喺商台節目坦言：「萬一不幸佢真係秋後算賬，條隊好長，唔單止係我哋……」接住打圓場話：「如果佢係聰明嘅，就唔會諗住報復為做事準則，如果係咁樣，社會點怎會和諧？」八方真係祝佢好運。

mailto:[email protected]