張栢芝同前夫謝霆鋒生咗兩個仔，分別係12歲大仔謝振軒（Lucas）同9歲嘅謝振南（Quintus）。回復單身之後，一直冇公開有新歡嘅栢芝，去年忽然傳出秘密生仔消息，原來B仔去年11月18日出世，栢芝稱呼孻仔做「小王子」，出世紙寫住小王子叫張禮承（Marcus），但父親一欄留空，生父身份至今成謎，而Marcus亦唔似兩個哥哥咁經常曝光，反而被媽咪栢芝一直刻意收埋。

兩個哥哥同行

噚日，栢芝喺Ig貼出一張推住就快滿1歲嘅Marcus坐BB車嘅相，不過都只係見到Marcus嘅側影，而樣子就被一撻紅色嘢遮住，栢芝留言：「非常感恩11月是他的生日，剛好10月哥哥學校放假，可以和他提前慶祝生日，一歲了，時間過得真快，沒想到他那麼喜歡去旅行，看到你每一天在遊樂場那麼開心，當媽媽的感覺實在說不出來！一歲快樂健康成長。」

原來，栢芝帶咗三個仔去日本旅行，佢喺Ig另一個帖文入面，貼咗一條短片，留言：「卡通衣服令我變得年輕。」片段中，佢講明自己正身在東京：「我位於東京，冇乜點shopping，人生嚟咁多次東京最少shopping一次，都係忍唔住買咗兩件衫。第一件呢件豬仔，好舒服，另一件係桃紅紫色熊仔，澀谷買，第一日着，勁暖、勁平，好舒服，我諗唔使百幾、二百蚊港紙一件。」
撰文：馮仁昭