袁小曼同男友廖偉強連日高調拍拖,表現風騷,仍未離婚嘅正印廖太當然嬲到震,佢好友仲爆料話廖太被激病,前日仲入咗養和吊鹽水,可憐廖太孤身住院,但久咳未癒嘅袁小曼就有男友陪睇中醫,明顯幸福得多,袁小曼噚日仲話食咗藥好番好多。不過當馮仁昭問到正印廖太入醫院一事,袁小曼一於懶理咁話:「我唔想回應啦,好想件事盡快結束。」隨即掛線,一改連日嘅合作態度。雖然袁小曼要封嘴避談戀情,但佢嘅Facebook就上載咗大量同男友嘅親密照,照片中兩個攬到實一實,sweet到痹。
此外,噚日有讀者報料指廖偉強非常風流,曾背妻同下屬搞婚外情,搭上咗鰂魚涌分店嘅同事,其後被廖太發現,其妻曾將廖偉強嘅行李送到佢喺鰂魚涌工作嘅辦公室示威,逼佢斬纜。