台灣29歲本土劇女星陳子玄去年同43歲演員陳建隆因溝通不良、個性不合結束四年婚姻，兩人育有一子「棉花糖」。噚日有台媒爆陳建隆去年9月曾對現年3歲、患有兒童發展障礙嘅兒子連打三巴掌，據報道指，囝囝疑惹爸爸陳建隆唔開心，被要求罰企，陳建隆坐喺梳化上，捉住放聲大哭嘅囝囝，叫佢企起身：「叫你站好聽不懂是不是」。但棉花糖因為好驚冇企穩，仲跌坐喺地上喊，陳建隆覺得囝囝唔聽話，狠狠掌摑囝囝三巴，而身為媽媽嘅陳子玄就未有阻止，竟匿埋喺角落拍片，打算以此作為要求離婚嘅籌碼。

聲稱當時害怕

事件爆出後，陳子玄噚日現身解畫：「那時我不知該怎辦，是想要保護小孩才會拍影片，傳給我爸媽。拍完當下我就立刻趕快去找小孩，當下蠻惶恐也很害怕。」陳子玄仲眼濕濕為陳建隆護航，稱佢係個幾好嘅爸爸，只有該次出手打仔，自己未被打過，而囝囝目前主要由祖母照顧。而陳建隆僅回覆台灣蘋果新聞網：「不知道，我沒看到，不好意思。」及後，陳建隆喺fb承認自己係片中人，並向公眾道歉：「很抱歉自己的行為拖累到別人，我在失敗中得到教訓與檢討，我的家我依然繼續雙手頂着保護它，再次跟社會大眾說聲抱歉！」佢表示已向台灣家暴中心解釋，認為自己身為爸爸但教養同能力不足而拖累別人感抱歉，承諾「會好好帶着孩子一起成長，不再失職」。
撰文：馮仁昭