由俞承豪同蔡秀彬主演嘅韓劇《不是機器人啊》，已於今個月6號首播，此劇屬MBC水木劇檔(即逢周三及周四播出)，港劇迷可於Viu上同步觀看。

劇集噚日播出第5及第6集，劇集講俞承豪飾演嘅企業家金敏圭患咗人類過敏症，一接觸人類就會全身敏感兼難以呼吸，令佢一直避免接觸同類，自己住喺城堡一樣嘅豪宅內，直到佢遇到蔡秀彬飾演嘅趙智雅後，佢嘅人生就帶來轉變。

俞承豪因為唔能夠同人類接觸，所以一直冇朋友，蔡秀彬陰差陽錯下假扮機械人去咗俞承豪屋企，噚晚劇情就講到蔡秀彬食錯嘢攪肚痛，點知又唔可以去廁所，仲老屈俞承豪放屁等自己成功上廁所，點知俞承豪聽到沖廁所聲，正當懷疑之際，蔡秀彬就解釋幫佢洗廁所。

而蔡秀彬喺俞承豪屋企見到自己阿哥，為免被阿哥認到，佢就即時扮貞子，把長髮遮樣。俞承豪同蔡秀彬透露父母已離世15年，蔡秀彬即安慰佢。此時俞承豪嘅初戀惠利爾來到大宅搵俞承豪，惠利爾並唔知道俞承豪有人類過敏症，仲搭咗俞承豪膊頭一下同拖佢手，原來惠利爾話父親要自己同佢結婚，仲提到政治婚姻，由於俞承豪敏感症發作，佢都趕不及回答就即衝返屋企打算打針阻止病情惡化，點知都未拎到就暈咗，蔡秀彬見狀即拿起針筒。

更多韓流，喺晒《娛果》
http://fb.com/appledailyent