不用英國調查都知，母親是每周工作一百句鐘的勤勞族，比其他打工仔的工時超長很多倍，而且沒有雙薪花紅，升職無份，全天候捱更抵夜，通常得不到甚麼讚賞。事關帶孩子是母親的份內工作，做不好會捱批，做得好麼，
ＯＫ，個個阿媽都係咁做啦，你有幾叻呢又？
你不忿氣，如數家珍般計數：每個阿媽，照顧子女，每周得花四十一小時。煮飯九小時，洗熨六句鐘，打掃九小時，管接送以為好easy，都花你五粒鐘。阿媽懶極都得每天辛勞十四小時，能享用六小時睡眠已經要還神。七除八扣下來，每日只得一小時私人時間。難怪近半媽咪頭髮前看像掃把，後面似地拖，SK-II美白面膜過期發晒霉都未有空敷上。出街化妝更是妄想，因為孩子會舔你的胭脂，用口水糊開眼線液。高跟鞋不是不可以穿，但要問自己，拗柴後還能拗腰捧住廿磅重紮紮跳的小冬瓜嗎？

疲累的媽咪，容易釀成家居意外。司機開車前咪飲就得，媽咪卻不可能冚旗。專家指出，母親為勢所迫，可能失去自己個性，感到遭生活壓垮。噢，做母親，忽然健康差，差在自我感覺被倒模，面口蒼白，無復產前的鬼馬精靈。做阿媽，是條不歸路，身份一經確認，啟動了程式，女人就要頂硬上，就算叫你搶包山，都要拍心口上。
捱騾仔似的阿媽，仔女與老公領情嗎？看看家裏的外傭，問心就知。做人還是實際點好，做阿媽更加無暇傾廢話，發明嬰語翻譯機有鬼用，日本仔最好砌個萬能鐵甲六合一機械人出來，分擔苦工兼做埋心靈聽筒，解放desperate阿媽。