早前曾提及，對今季似想打快攻的霍利時馬房，沒幾多馬鍾意，一周過去，大致沒大改觀，只可說，有一、兩駒進展比預期好。
今周二有七組大閘，當中三組是草地800閘，霍利時只在第二組有馬試，且有三駒同組考驗，分別是「大龍騰」、「君臨大地」及「樂趣」。對「大龍騰」與「君臨大地」表現，會用刮目相看來形容。
過去一直唔鍾意「大龍騰」，朝早得把口，性急重口，有點兒不受操控，也因性情欠穩定，長期常見有汗濕，上季操來操去都差唔多款，出賽無表現，也與此有莫大關係。今季再見，首先覺得無咁急，然而未足以對其完全改觀，直至周二睇佢試閘，縱然幾肯定，羅理雅幫到唔少，卻起碼難得肯聽話，無死咬韁口走晒收工，大半程留得住，末段都算有點追勢，狀態談不上理想，只是比起上季已算有進步。
最意想不到，其實是同組出試廐侶「君臨大地」，同屬上季完全未鍾意過的馬，只知道牠是中長途馬，曾輸近而欠說服力走勢的假象馬。直至試閘前，操練唔算多，800短途閘對「君臨大地」而言，也嚴重偏短，睇過名單，無預期會有表現，由於非目標，基本無點理佢，但即場睇番重播，居然在終點前閃閃身追上前列，過終點後更過晒，表現絕對有驚喜。季初中長途賽程唔多，也不排除可能要熱身開氣，卻因這課閘，令我會多加留意牠。