林德信、蘇麗珊、顏卓靈、鄧小巧及釗峰等，今日出席商台舉行嘅「叱吒樂壇 Back to School Live」，原本活動喺尖沙嘴文化中心露天廣場舉行，但因天雨影響將地點改為喺商台內繼續，歌手們全部着起校服，唱住歌陪學生們預備開學，節目尾段仲有鄭伊健擔任神秘嘉賓，化身訓導主任現身同歌手們合唱《友情歲月》。

伊健接受訪問時話，同成班後生仔玩得好開心，佢話：「雖然o依家做音樂好難，但諗番起以前樂壇自由度無咁大，以前出嚟唱歌想要Live Band唔係咁易，全部都係唱MMO，反而o依家樂隊及唔同類型嘅歌手多咗好多。」

之前有傳聞話伊健嚟緊有機會喺紅館再開騷，佢話：「都係傳啫，自己當然好想啦，但係要睇緣份同檔期，有咩開心得過企喺舞台上表演。」接落嚟伊健話要替電影《黃金兄弟》宣傳，仲話希望同成班演員喺香港做多啲謝票活動，佢話：「做多啲都唔怕，香港好細啫，最好長做長有，咁我哋就長謝。」

多年無着起校服嘅林德信表示，今日令佢諗起以前喺英國讀書嘅時候，佢話：「我12歲去英國讀書，每日都要着西裝返學，當時啲同學開始學識飲啤酒，我為咗融入佢哋亦跟住一齊去，成日都飲醉。」雖然好鍾意蒲酒吧，但林德信話自己成績好好：「我考試有9個A，所以我對自己嘅成績好驕傲。」講到工作，佢話o依家拍緊電影，稍後就會返香港幫ViuTV拍劇：「自己都係第一次拍劇，不過因為唔想分心所以仲未睇劇本，對手同角色都未知。」

另外，同樣着住校服嘅蘇麗珊就話，自己以前讀書時好鍾意挑戰校規，佢話：「以前因為貪靚，鍾意條裙整短啲加上成日游水，頭髮會變啡色，老師成日都捉我犯校規。」今日活動需要唱歌，蘇麗珊話自己都會獨唱兩句，佢直言：「自己唔係歌手，但現場睇住歌手們準備演出嘅感覺好正，有機會都想試下唱歌，不過自己知道把聲唔夠好。」佢透露稍後會跟同公司嘅釗峰合作拍MV：「希望到時釗峰會指點吓，教我點唱歌。」

精選娛聞，喺晒《娛果》
http://fb.com/appledailyent