黎耀祥、麥長青同江美儀等，今日喺荃灣出席仁濟50金禧嘉年華，已經做咗仁濟慈善大使5、6年嘅祥仔，一直都好支持，尤其佢哋嘅特別需要服務。問到祥仔係咪準備開新劇《逆緣》？佢話：「未，會做風雲音樂劇巡迴。」係咪同夏文汐第一次合作？祥仔話：「係呀，未見過面，已經覺得好刺激，夏文汐姐姐係我細細個時候嘅女神，覺得佢係好有型好有性格嘅人，遲啲會開會，試造型都會食餐飯。」祥仔話未知佢哋有冇感情線，問佢會唔會叫監製加親熱床戲？祥仔就笑晒口話：「唔使啩，我哋呢啲斯斯文文，鬥吓文戲就算啦，我諗我哋嘅化學作用幾好，喺TVB好難搵到未合作過嘅對手，高手過招係好事。」祥仔仲透露嚟緊10月會返內地拍戲，係佢嘅第一次，問佢係咪天價？佢笑咪咪話：「到時先話你知。」

而麥包同美儀主持嘅訪談節目《關你家事》收到14宗投訴，佢哋就話覺得係小事，美儀話：「節目對公司嚟講係新嚐試，新嘅處理手法，新嘅衝擊，大家可能習慣咗就會追睇，有衝擊係預咗。」會唔會打擊信心？美儀就話：「我覺得唔會，因為未有人試過，我哋主持恰如其份。」麥包就話覺得個案嘅主角都係想分享經歷，希望可以修補家庭關係，佢話：「我哋拍2個鐘，出街得21分鐘。」