已故巨星張國榮（哥哥），於1993年嘅電影代表作品《霸王別姬》，25年後嘅今日，經過數位修復，噚日喺台灣再度上映，與此同時，電影公司將當年未有曝光嘅拍攝花絮公開，片段中有哥哥等人嘅訪問，哥哥喺片段中透露其演戲心聲︰「我自己喜歡演一些比較悲劇人物。」

今年喺哥哥逝世15周年，而佢主演嘅電影《霸王別姬》，今年亦係上映25周年，該片最近修復完成，喺台灣再上映，唔單止可以重溫哥哥嘅風采，片商仲將當年未曝光嘅製作花絮公開。整段製作花絮片段，大約有22分鐘，先後有三位主角張國榮、張豐毅和鞏俐，詳談角色及拍攝嘅心路歷程。當中哥哥亦剖白佢對其角色「程蝶衣」嘅感受，佢話︰「程蝶衣是一個比較自戀，跟自我的一個人物，性格方面，也是一個悲劇人物。」

哥哥談到自己比程蝶衣幸福，「我不希望做程蝶衣，我意思是說，我本人不希望做他，因為我，老實講我比他幸福太多，可是我非常愛演這一個角色，因為我覺得，基本上，我自己喜歡演一些悲劇人物。」

哥哥亦提到拍攝之前要苦練京劇同身段，當時導演陳凱歌，仲安排咗兩位替身畀佢，但後來拍攝過程，每個動作哥哥都親自上陣，最後亦唔需要用兩位替身，因此令哥哥感到好安慰，全因佢努力學習嘅成果。而該片當年榮獲第46屆康城影展金棕櫚大獎，亦係至今唯一一部華語片奪得此殊榮，而《霸》片亦令哥哥演藝事業攀上高峯。至於《霸》片修復版本，暫時只有台灣上映。

精選娛聞，喺晒《娛果》
http://fb.com/appledailyent