「香港人好鍾意食海鮮，但對年輕一代嚟講，最大問題係唔識處理，亦無時間細揀。」把頭髮漂成灰金色的「漁花海鮮批發」網店主袁詠珠（阿花），打扮跟一般九十後無別，同樣時髦貪靚；但當她穿上圍裙，腳踏水鞋在漁市場遊走時，卻搖身一變成為了「劏魚神手」，為她口中的年輕人提供包劏包送海鮮服務。「屋企本身係經營海鮮批發生意，一年前我決定開發網上平台，以另一種手法延續家族生意。」在澳洲修讀酒店管理，曾在當地工作一年的阿花不惜與當護士的妹妹一同辭去正職，全力開拓網購市場；有人視之為「浪費學歷」，但阿花卻無懼別人冷水指：「一手一腳打理生意好有滿足感，之前喺酒店做嘢好拘謹，呢到大家都好直接同真誠，唔會單單打打，令生活簡單同快樂咗好多。」

拒做「少爺兵」
每朝六時，阿花的身影就會出現在香港仔魚類批發市場之內，先是忙於入貨，後是落手落腳處理海鮮，上至魚類下至龍蝦及長腳蟹也難不到她，熟練程度絕不比老前輩們失色。「始終我同妹妹係女仔，一開始伙記們都好照顧我哋，成日提醒我要小心地滑。」笑指自己粗生粗養的她卻沒乖乖聽從，經常爬高爬低上船取貨。訪問當天不時有小強出現在檔口四周，阿花輕鬆地說：「呢到係漁市場，老鼠都有出現過，但邊有得驚，大家嘩完一聲後又繼續做嘢。」說時遲那時快，她再次站到砧板前，著手處理剛剛送到的蟶子。

阿花在一年前推出手機App「漁花海鮮批發」，望把家族的批發生意擴至零售層面，原先目標明確，就是以環球活海鮮作賣點。「一開始我哋會拎住冰桶養住活海鮮咁送貨俾客，有啲人見到咁生猛係好開心，但原來唔係個個受呢套。」專業師傅劏魚可能只需一分鐘，但門外漢卻要花多十倍或更多時間處理，店鋪因此推岀包劏包洗服務，加上消費滿一千元則會免費送貨，成功切合到生活忙碌的港人需要，令「漁花」名堂得以打響。

港人愛搶愛打卡
「爸爸對我哋兩姊妹做生意要求好高，就算當日無單都要落嚟市場了解環境同行情，因為佢唔想我哋退步同脫節。」市場於下午一時關門，阿花則會善用這段時間送貨及交收。「食完晚飯後就要開始搞第二日嘅單，例如要手切套餐內嘅安格斯肥牛，自己整調味同醬料等等，忙起上嚟試過每日只瞓兩三個鐘。」其另有售燒烤及火鍋套餐增加客路；網店現時每週有十至二十宗訂單，算是站穩了陣腳。

年輕人愛搶購平價機票，「漁花」亦不時推出限時優惠吸納新客。「好多人會因為價錢而唔肯踏出第一步，雖然優惠活動係無錢賺，但我希望大家有誘因去試唔同海鮮，覺得物超所值時自然就會再幫襯。」阿花會教導客人如何處理海鮮，不希望「賣完就算」，送貨當晚更會問及客人食後感，希望了解更多。「後生仔都鍾意呃like，現時奄仔蟹比較時令多人食，但當活生生地蒸時，奄仔蟹會因為掙扎而斷手斷腳，變咗賣相唔討好。」她建議客人可在烹調前一小時將活蟹放入冰格，或是以酒先把牠們灌醉。

切身體會父親壓力
市場內又焗又熱，男士們都光著上身地工作，姊妹二人不時做得汗流浹背，但仍十分享受。「可能大家覺得街市人大大聲，滿口粗言穢語，但其實呢個地方充滿人情味，佢哋就算係老闆都完全無架子，會好提攜後輩。」而被阿花尊稱為「恩師」的容先生正是其中一位，他說：「我由細睇到佢（阿花）大，佢唔怕辛苦唔怕邋遢，最難得係佢一個女仔讀完大學都肯入行，好多男仔都未必肯做。」

職業無分貴賤，阿花比任何人都更明白。「我哋每日都要親自劏海鮮，有時魚鱗同魚血會彈上身。有次我同妹妹要趕去銀行入數，啲人一路排隊就一路捏著鼻，我哋覺得好難受，唯有快啲離開，決定以後要梳洗好先再出去，廢事影響到人。」這段難忘經歷並沒讓二人蒙上陰影，反之更能切身處地體會到父親的辛酸，令到彼此關係更好。身為家中長女，有一妹一弟的阿花直言不視繼承父業是壓力或負擔，問到身為潮州人的爸爸會否重男輕女時，其毫不猶豫地回應：「無！爸爸反而比較錫女，可能因為我哋比較乖，哈哈！」說罷她再次迎著海風，展起燦爛的笑容。

採訪：黃綺敏
拍攝：梁正平