鄭國貴成為錦鯉癡已經廿幾年,五年前佢喺日本邂逅合子,當時合子已經係日本關東地區冠軍。鄭國貴一見鍾情,花咗近70萬港元將合子據為己有,近年帶住合子喺中港兩地參賽,多次奪得后冠,如今身價隨時過百萬港元。不過,鄭國貴話養錦鯉係燒銀紙嘅嗜好,佢𠵱家喺南海租魚場養住200幾條錦鯉,水電同飼料每月花費二萬幾蚊,隨時貴過養人。
煲呔都有玩錦鯉,香港錦鯉會副會長列應揚話佢冇入會。有會員同八方講,玩錦鯉會上癮,隨時越玩越貴,佢估計煲呔可能驚俾人話佢浪費、奢華,所以唔敢造個大魚池,買魚都要忍手,魚與特首,不可兼得。