何超鳳主持嘅香港芭蕾舞團今晚喺灣仔舉行籌款晚會，一眾名媛、張天愛（Flora）、林心兒等出席支持。Flora前夫邢李㷧早排盛傳同林青霞離婚（新聞連結： https://bit.ly/2Pha5WX ），Flora就幫忙澄清話：「唔知，點解個個都問我？我哋成日見，冇事，冇事。」問佢哋係咪一家人一齊出嚟？Flora就話：「一家人開心，你哋點寫佢哋都唔會解釋，根本唔想講，一家人天天keep happy，冇事。」

作為香港芭蕾舞團董事局成員嘅Flora，透露支持舞團30多年，目的係為咗支持香港文化，當年由Flora爸爸張有興開始，Flora希望可以一代傳一代，傳至邢嘉倩到其孫女。提到兩孫女，Flora笑話：「已經迫大孫女做一字馬，小朋友比較鬆，但係呢啲唔可以迫，如果佢鍾意我一定會親身教導，我已經買咗芭蕾舞鞋、魔術棒，被動地感染佢，係要睇佢能力同鍾意，因為跳芭蕾舞係全世界最辛苦嘅事，跳24小時都可能冇乜錢。」

問到兩個孫女嘅近況，Flora話大孫女已經識叫佢「Na Na」，佢話：「因為英國人叫祖母係Na Na，我細個都係叫Na Na，因為我喊嘅時候係Na Na咁叫。」

另外，關心妍（Jade）同老公拍拖到場，Jade笑言日常要處理慈善基金嘅工作，忙到冇時間同老公拍拖，佢話趁今晚可以悉心打扮二人世界，問到佢咁忙咪冇時間再造人？Jade笑話：「o依家連自己做人都好忙，又要湊女，又要工作，短期內都唔會住，過一段時間先。」

精選娛聞，喺晒《娛果》
http://fb.com/appledailyent