相信有唔少人都聽過「直升機父母」（helicopterparents）呢個名詞，意思係個啲好似直升機咁，不斷喺子女上空盤旋，見仔女一有乜嘢唔妥，就即刻降落同佢哋解決問題嘅過份緊張父母；如果係咁嘅話，葡萄牙球星基斯坦奴朗拿度（C朗）就唔單止係「直升機父親」，仲可以話係「戰機父親」㖭！因為佢為咗保護一歲大嘅囝囝小C朗，竟然選擇軍方基地同小C朗領洗！

忽然低調以保安全

C朗喺舊年6月首次榮升為老竇，不過仔仔生母身份成疑，仲有傳只係代母；而C朗初時就冇好似其他名人明星咁緊張囝囝小C朗嘅安全，又叫阿媽帶小C朗去睇皇家馬德里嘅聯賽，捧自己場，早前同埋名模女友艾琳蓮及小C朗「一家三口」去玩，亦都冇刻意替小C朗遮面。
不過，唔知係咪高調得滯，C朗最近開始知驚，怕個「金笸籮」俾人綁架，所以，為咗安全計，喺上周五當小C朗一歲生日時，C朗竟然選擇喺家鄉葡萄牙里斯本附近嘅阿爾科謝蒂（Alcochete）一個軍事基地嘅教堂，嚟替小C朗領洗。據講，着住軍服兼手持機槍嘅空軍，荷槍實彈喺外圍守住，驅趕一啲冇獲邀請嘅人，場面認真大陣仗，唔知嘅話，仲以為係有乜國家級大人物嚟探訪軍營㖭！而出席得小C朗受洗禮嘅，都係26歲嘅C朗身邊最親密嘅人，包括佢嘅媽媽、家姐同埋女朋友等。
喺儀式結束之後，C朗佢哋一行人就到咗佢家姐姬迪雅嘅屋企，開party慶祝。姬迪雅話：「小C朗嘅領洗儀式真係好正！我哋想同所愛嘅人，去分享咁美麗同特別嘅時刻，我哋實在好開心。」