當年今日

水果蜂蜜代替砂糖

蘋果日報 2002/01/08 00:00


天氣乾燥,蜜糖即大派用場。中醫師江健華話蜜糖有補中益氣、增強體能、清熱、滋潤大腸等功效,基本上男女老少都啱飲。專門出售蜜糖嘅養生源,除咗本港,東莞、廣州及深圳均有專門店,負責人黃生話佢哋嘅產品全部係自產自銷,而本港分店則開業約兩年,裏面嘅蜜糖超過十五種以上,除咗基本百花蜜、冬蜜,重有藥材或水果蜂蜜,亦有蜂膠產品、蜂皇漿、花粉等等,既可以內服又可以外用達至美容效果㖭。
記者:陳冰麗 攝影:關文慧、陳盛臣
水果蜂蜜小朋友口味
小朋友最愛甜味,咁大可以考慮吓服用水果蜂蜜,呢度嘅種類都好多,有柑桔、荔枝、龍眼、枇杷等等,呼吸不暢嘅話可以食用龍眼、枇杷蜜,滋潤又止咳化痰,小朋友或老人家至啱,尤其是家陣乾燥天氣,喉嚨零舍易敏感,食蜜糖可以話係至佳之選。而胃口欠佳,則可以食吓柑桔蜜、荔枝蜜。
除沖調飲用外,以水果蜂蜜代替砂糖來烹調,健康又香甜。製作酸甜汁時以蜂蜜代替砂糖,又或在雞翼上塗少許蜂蜜烤焗,在煮好的燕窩中加入少許蜂蜜同食也可。
藥材蜂蜜療效多元化
蜂蜜即蜜糖,係由蜜蜂採集植物花汁再充分釀造而成,營養相當豐富,可以話係天然補品,中醫師江健華話蜂蜜除咗有清熱、補中潤燥療效外,由於佢糖分高,小朋友空腹按比例食,更有杜蟲功效。
養生源內有着各種藥材蜂蜜,其中包括有枸杞蜜、川貝蜜、黨參蜜、五倍子蜜等等,分別有活血、止咳化痰、益氣補血、潤肺等功效,呢啲藥材蜂蜜都係市面上比較少見㗎!
可在製作蛋糕甜品時,以之代替砂糖,分外香甜,亦較健康。另外沖調花旗參時,亦可加入少許黨參蜜以中和花旗參的涼性。
洋槐蜜改善情緒
如果經常失眠,呢款洋槐蜜就至啱閣下,洋槐有祛濕利尿、寧神作用,按分量服用有改善人嘅情緒。
洋槐係一種潔白如玉嘅植物花,每年春末夏秋盛放,主要產自山東、河南、河北,做出嚟嘅蜂蜜色淺、清香清甜。
蜂巢蜜降火
食得煎炸肥膩嘢多而搞到牙痛、咽喉唔妥、虛火盛,蜂巢蜜就至啱使。蜂巢蜜內嘅蜂巢正係精華所在,個蜂巢雖然比較醜,但黃生話營養及療效都集中喺呢個巢內,必要食晒佢,一個巢大概可以分十次食用,喺喉嚨唔舒服時服用最適合不過。
而浸住蜂巢嘅係椴樹蜜,可以沖水飲有助改善皮膚膚色㖭。
醒目小貼士
1.沖蜜糖宜用暖水開,水溫勿超過攝氏60度最佳。
2.除咗沖水飲,重可以用蜜糖調果汁、咖啡、牛奶、豆漿或搽麵包。
3.未食嘅蜂皇漿必須存放於雪櫃內。