做人同飲酒一樣要適可而止，咁樣做人就有人品、飲酒亦會有酒品。上個禮拜辭職嘅紐卡素前領隊奇雲基瑾，喺班主艾殊利同內部人士近日嘅爆料入面，睇嚟就冇乜人品啦！
近日被基瑾唱衰嘅艾殊利，周日終於透過報章反擊，佢重申3個重點：1）基瑾入職前同意聽足球總監支笛；2）董事局成員冇干預過基瑾；3）基瑾破壞咗唔公開評論轉會事務嘅協議。此外，艾殊利最不滿係基瑾容許英超領隊協會，就事件發表相關聲明；正所謂家醜不得外傳，有咩事閂埋門慢慢傾！

艾殊利話已事先聲明

艾殊利仲話同基瑾簽約前，講到清清楚楚佢只負責操練、戰術、選人同領軍。換言之，基瑾上個禮拜所有牢騷都唔成立，因為佢一早就預咗係咁！我求大俠覺得基瑾冇理由記性咁差，亦唔懷疑艾殊利講大話；大家都知艾殊利嗜飲酒，會唔會當時基瑾傾條件不勝酒力貓咗，於是第朝起身唔記得老細講過乜，先鬧出今次不愉快事件呢？
但據另一位紐記內部人士所講，基瑾從來都搞唔清楚球隊現狀，「佢面試嗰時，會方表示紐記行阿仙奴路線（青春班），唔會好似車仔咁洗腳唔抹腳！」點不知，基瑾冇幾耐就話要簽碧咸，今夏轉會窗關閉前，仲列出買人清單：亨利、林柏特、朗拿甸奴同活基治等。結果被職員改花名叫「癲佬之王」！
癲都算啦！據講基瑾仲越權㖭！話說今年6月佢私下同林柏特經理人見面，之後好似執到寶咁同高層講：「林柏特表示願意以周薪20萬鎊（約270萬港元）加盟！」嘩！如果基瑾真係咁都幾離譜，不過呢啲嘢公說公有理，婆說婆有理，我哋旁人好難畀意見，希望紐記儘快搵個合拍嘅領隊，打好波畀球迷睇啦！