低息環境與資金充裕，係好友自金融海嘯後沿用經年的入市理由，擺明係因時制宜因勢利導搵政策着數，看似理所當然。外資銀行面對扭曲操作（OT），銀行已不能再靠息差發圍；內地銀行迎戰反壟斷、甚至利率市場化，適逢樓市要擔心財爺出招，未待出現港人港地，已見中資財團富豪同胞高價搶地皮吸豪宅，提早宣示誰是主場。經過早前企業發債潮後，銀團貸款生意頓成維生之計，歐資行撤退，中資行招兵攝位，可惜從近期銀行動態，卻是令人不安。
歐資投行假期前繼續手起刀落，裁員風未見休止，只是未見得如大銀行般開宗明義地高調做給分析員看，只因對今年首季表現越來越冇眼睇，話說雖然歐美十大投行於環球投行總收入佔有率仍分別達15%及30%，比重與排名算是維持不變，可惜的是市場大餅明顯縮水，尤其在DCM業務中成功打入十大的歐資大行德銀、瑞信、巴克萊及滙豐，加起來與去年相比，同比共跌去300個基點至17%，難怪有歐資行自3月底以來，日日不停向員工開刀，本輪中伏者，已經輪到盤房交易員即trader，足以反映局內人如何看前景。美資行亦不見得好多少，假期前風聞宇宙最強美資大行的內私人銀行，下月開始停發底薪，意思係讓你有時間自行安排自己前途，有銀行家已決定打道回府湊B，更有銀行家已準備好執包袱回大學執教鞭。
胡孟青
獨立股評人