蘇志威（蘇老闆）今日喺會展婚妙展，為其男禮品牌LUXE Tuxedo擔任期間限定店長，蘇老闆即場為一個準新郎精挑3套禮服款式。

蘇老闆指呢幾年嘅生意ok，所以自3年前喺會展擺過攤位之後，今年再擺嘅目的，除咗慶祝灣仔分店開張之外，仲想回饋顧客，最平可以減至半價。會唔會再開分店？蘇老闆話：「慢慢嚟，唔係印銀紙，做生意要守、要有策略。」

問佢當年同太太劉小慧結婚，對禮服係咪好挑剔？蘇老闆笑住話：「想挑剔都冇用，都係黑、白、灰，我記得我係著白色，我老婆有幾件，進場一件，敬酒嗰件係湖水藍嘅長裙，如果當年我開咗舖就好，我會揀件湖水藍西裝，可以襯到絕，佢條裙仲放喺屋企，可惜，當年我搵唔到。」銀婚再著？蘇老闆即刻話：「我結婚都20年，睇下點啦，幾年後嘅事，我哋又唔係咁高調。」

精選娛聞，喺晒《娛果》
http://fb.com/appledailyent