【收市閒情】當新世界鄭志剛 揀Hypebeast唔揀FB…(千頌C)
鄭志剛新世界fbHYPEBEAST收市閒情千頌C
見唔見「Presented by Adrian Cheng」。
話說,有日行經太古廣場,驚見Joyce賣緊件DHL雨褸,咩呀?本來呢件事已經驚嚇過見到關家姐,更驚嚇係,件嘢盛惠5000幾銀。Fat唇嘅嘢我識條鐵咩?唔識咪上網搵!唔Search由是可,一Search竟然發現有個富三代幫Hypebeast(8359)寫專欄,仲要係中英對照嘅藝術Fat唇潮牌文,咁啱,呢位富三就係講緊呢件黃色雨褸點解會矜貴咗。
即係咁,都唔賣關子,點解鄭志剛貴為新世界新旗手,要搵創仔Hypebeast寫專欄,仲要見到周大福個FB Page有Share?要寫嘅,佢一開聲,各大傳統傳媒爭住幫你大字標題開欄位,大大聲「恭迎鄭公子」;再唔係掟舊錢去開FB Page,甚至四叔咁,自己開個個人網頁,想點玩到天花龍鳳都得,點解要去Hypebeast呢?
首先,點解唔用FB?依家要有影響力,唔使Networking,只要識得經營網上平台,素人一個都可以大紅大紫。不過,當一個富豪名人、高官闊太,掉轉想反攻網上世界?除非你甘心玩貼地,仲要貼到好似當年曾俊華咁玩FB到出神入化,否則你想用網搞形象工程?唔畀嬲嬲你都偷笑,唔信?你望吓Package Lau個FB?今時今日FB已經難有Reach,畀錢買Like又肉酸,再唔係就畀人鬧,開來托嗎?
第二係,咁呀鄭志剛一向都係Sell藝術人,開欄梗係講番自己最在行嘅藝術。你喺傳統大眾傳媒(當係蘋果咁計啦,雖然政治不正確)講藝術,啲讀者又唔識嘢;你喺其他報章網上版出,又冇人睇。係嘅,就去盡啲,走國際路線。咁Hypebeast來講,一來佢係國際潮牌網頁,但同時又係香港出品,唔會畀人口實。多人睇得來又中後生仔Market入到屋,講離地嘢名中言順得來又型型地。
講到尾,當然可以話鄭公子搵呢個平台係聰明之舉(題外話,佢係有IG),但更重要反映,世界冇嘢係必然。當鄭公子會喺間創板公司寫欄,你又點知件5000幾銀黃色雨褸會冇人買?所以只要吹到個賣點兼Timing好,就算聲稱係「新世代首置計劃」嘅新世界天生樓,按息其實仲高過銀行,到最後,分分鐘都係好多人搶。