賭業股又升到甩轆，買落後，買海王集團（070），目標價？The sky is the limit。海王主打叠碼仔業務，由6月25號港股見底到家陣，集團累升46%，唔算多。場內英皇娛樂酒店（296），同期升咗77%，實德環球（487）更大升近兩倍！又龍頭銀河娛樂（027），6月25號市值高達1,460億銀，但到家陣，亦都升咗65%，海王落後到冇譜。
海王7月踏入2014年財政年度，澳門由該月至9月，博彩收入1,175億銀，大增20%。而大行估計，10月澳門博彩收入，可以上到345億銀，按年大增25%。大環境超級靚仔，加埋海王業務，覆蓋晒威尼斯人、金沙、銀河星際等大孖沙級數賭場，有主場優勢，單係自然增長，海王已經掂過碌蔗。
又今年2月，海王完成收購「精金」20%權益（海王有權加碼），而中介人推廣商向精金保證，喺收購完成日期後頭兩年，精金每年獲保證利潤2.75億銀。照計數，喺2月打後兩個周年，海王因呢壇收購，可以額外增加5,500萬銀利錢，相當於海王2013年度實際純利3億嘅18%。海王進一步通過收購，去擴大財路，掂晒！