【老婆預產期撞騷期】「男人要搵食冇計」Bob過大海開工冇得陪產?
Bob父親節
今日父親節,圈中星級爹哋都乘機晒幸福,但Bob就喺大陸搲銀,工作中度過,三個囡囡唔可以正日父親節親親爹哋,Bob喺facebook貼出日前帶妻女入迪士尼嘅相,憑相寄意。
Bob今日回覆《蘋果》時話:「呢段時間喺內地拍緊電視節目,今日父親節冇得同屋企人一齊過,但之前帶咗老婆同三個女入主題公園玩,一家人又食又玩,提前慶祝咗父親節。其實,o依家慶祝啲乜節物節,完全唔關自己事,純粹係有藉口畀小朋友出去玩,冇所謂啦,我做爹哋嘅,佢哋開心先係最重要。」
問到Bob父親節想收到乜嘢禮物?佢話:「已經收咗,咪就係老婆肚入面就快出世嘅BB。」Bob嫂Pearl懷胎6個月,預產期喺9月,佢o依家肚大如籮,但行動都敏捷,嗰日入迪士尼玩,Bob嫂挺住巨肚仲一拖三女,Bob負責做攝影,同妻女影靚相留念,Bob話:「囝囝幾奀皮,成日喺媽咪肚郁嚟郁去,踢到老婆嗌好痛,哈哈,希望佢乖乖哋,唔好令到媽咪咁辛苦。」Bob因為係全家經濟支柱,好快又多埋囝囝,要養晒全家六口真係唔容易,Bob好努力賺奶粉錢。
分身乏術嘅Bob幾乎冇時間陪屋企人,佢話老婆預產期,仲撞正佢喺澳門開talk show,Bob話:「我都幾擔心,真係撞到正,我都安排定屋企人到時幫手照顧住老婆同三個女。男人要搵食冇計,手停口停,呢個時勢,有得做就做多啲好,一家大細靠晒我嘛,希望老婆會體諒。」咁點樣補數先,Bob就口爽爽話:「最多之後送返粒石俾佢。」
好大手筆喎,鑽石嗎?Bob搞爛gag:「我之前……生嗰粒腎石呀!」啋,大吉利是咩!
想隨時獲得更多親子資訊,快啲like Easy PaMa Facebook啦!
https://goo.gl/1qWM8g