【本報訊】高琳琳的生命故事，當年感動全城，鼓舞了一些人，有𠝹手學生在網誌留言，說從此丟掉𠝹刀；也有13歲青年說打消了自殺念頭，珍惜生命。高媽媽陳文琪說，有些創傷壓下去不處理，反而會變為計時炸彈，可幸她與丈夫都不喜歡收收埋埋，開朗的她喜歡講出來，內斂的高展鵬就愛寫出來。當年傳媒廣泛報道，透過不斷分享，倆口子說創傷反而在不知不覺間治癒，比較釋懷。
人生在世，總遇到十字路口。胎兒發現異常，堅持生下還是中止懷孕？生下來，堅持戰至最後一刻，還是選擇放手好好告別？每個人的選擇，大抵都有不同。「有好多朋友你成日見面，但你從來唔知佢有過相類經歷、試過小產，因為琳琳，唔少朋友主動同我提起呢啲唔開心嘅經歷，大家嘅關係反而因為咁變得親密」。越收埋越痛，傷口多年未癒合，以為不再痛，其實從未放下。

樂天媽媽終釋懷

「同人傾起，先發現過咗十幾年，好多人講起仍然會喊，好傷心，埋怨自己埋怨其他人」。直視自己的軟弱，再強悍都好，總需一個膊頭，「琳琳走咗之後頭嗰幾年，喺大學教書，每次教到異常胎兒，都會眼濕濕，最初兩年，學生都知咩事，到第3年，嗰批學生已經唔知，見到都會好奇怪」。在大學做研究，曾幾何時，陳文琪說寧願研究老人家也不敢觸及病童，擔心觸景傷情，承受不了那份痛，「𠵱家OK，可能因為我鍾意講嘢！」這個樂天的媽媽，應已放下。
■記者呂麗嬋